السلام عليكم
كيف دايرين الخوت والخواتات
مزيان الله اخليكم ديما صحاح فصاح
المهم وانا صغير ماشي بزاف
ديك الساعة في عمري شي 16 سنة معلينا
المهم وانا غادي لدار ديك الساعة كنت ساكن في واحد الدوار تيقولولو القرية
او بلغة الشماكرية دوار الداخل مفقود والخارج مولود
الحاصول او ما فيه وانا غادي او شاداني التقفقيفة ماشي ديال الخوف لالالا راني كنت مغالط معاهم ولكن ديال البرد
جات عندي واحد المسخوطة كنقولوا ليها تما المنشار
حيت تجيب خبار او تدي خبار
وانا نلعن الشيطان او سبقت ليها السؤال
اشنو باغا تاني مني راني ...
مكملتش او هي تجاوبني
وبلاتي غير سمع مني هاد الهدرة او حكم
قلت في راسي كيفاش المهم امرتها باش تهدر
او هي تقول ليا بلي واحد البنت ساكنة حدانا تتبغيني او مقدراش تهدر معايا
او ونا نتفرتك بياس ديتاشي او قلت معا راسي اواه انا دريا كتخطب فيا
المهم درت براسي راني فشي شكل او راني عندي الخبرة في التصاحيب
او قلت ليها شكون هاد الدريا
او هيا تذكرها ليا كانت بنت الطيابةالي خوها كيسموه الوحش الغير مروض
الحاصول او ما فيه انا تصدمت بحال الا تضربت ب380 فولت ديال الضو
او انا نقول ليها نتي كتقلبي ليا على شي شبعة ديال التكشميط
او هيا تقول ليا والله منكذب عليك
المهم انا قلت ليها حتا نفكر
مشيت لدار وانا دماغي مشلول على التفكير علاش زهري طاح على الطيابة
اتفو عليك يا المسخوط
او هيا تجيلعندي الوليدة مالك السكع معامن مضارب تاني
لا الوليدة غير معا راسي حيت زهري دارها بيا او طيحني فيك نتي او هي تشير عليا بواحد الشربيل الكمارا تراخخخخخخخخخ
او نخرج مكريط برا واللله يا الوليدة معليك
المهم دخلوني الجيران او في الغد تلاقيت المنشار
ماشي ديال النجار ولكن ديال الدوار
المهم قالت ليا اشنو جوابك قلت ليها انا موافق ولكم بشرط
قالت ليا اشنو شرطك
قلت ليها نبغي سرنا يبقا هنا
قالت ليا كون هاني
او حددت معاها موعد باش نلقا بنت الطيابة
الحاصول جاء اليوم الموعود
اشنو غادي نقول ليكم
انا حشمان او هي حشمانة
بقينا جالسين شي ساعة مكنهدروش
او انا بغيت ندير فيها رومنسي
او قلت لها عرفتي انا غير شفتك او انا نتفرتك بياس
او هيا تحنزز فيا بي واحد العينين معمشات
او انا نتخلع منها او قلت ليها غير كنت نضحك معاك
المهم خرجت النهار غير بي 66 كشيفة
او بغيت نبعد منها او انا نتاصل بي واحد المسخوطة مسمين عليها الدينامو
او قلت ليها ها العار اعطيني شي حل
او هي تقول ليا الحل موجود ولكن خصك تخلص
فاكيت معاها الجرة ب 5 دراهم
او هي تعطيني واحد الوصفة سهلة مهلة
قالت ليا دبر على كرطونة ديال اتاي حبوب او دير فيها القطن او دير فيها لفتة حمرة او رسم فيها وجه بنت فرمة او دير فيها خيط على شكل مشنقة او لصق بونتة ديال كارو كازا او كتب ليها برة فيها هاد الشي
"من عاشق تلفان الى فتاة ذات عقل طيشان
الف تحية تحملها وردة سوداء زغبية ليك يا الحولية السردية شوفي لحالك او كمي هاد البونتة او قجي راسك بحاد القنب"
درت هاد الشي حرفيا او سيفطتو على شكل كادو
ههههههههههه الغد صبحت موجدة ليا سطل ديال ليقامة غير دزت من تم او هيا تبدا عليا بالتنياش او انا غادي مورك راجع لدار حتا دخلت عاد رجعات
سولتني الوليدة كي العادة او انا نقول ليها غير لعبين دينيفري
وانا كنقول في خاطري الله اياخد الحق في الي كان حيلة او سباب
الحصول او ما فيه من داك النهار او انا وياها كي المش معا الفار
نحمد الله غير منين الوحش مساقش الخبار كون راني سرت في خبر كان
تحياتي لكم
موضوع: بنت الطيابة 
الأحد مايو 16, 2010 1:46 pm
